ਸਥਾਨਕ ਖ਼ਬਰਾਂ
ਵਿਸ਼ੇਸ਼ ਰਿਪੋਰਟ : ਖੇਡਾਂ ਵਤਨ ਪੰਜਾਬ ਦੀਆਂ ‘ਚ ਪਹਿਲਾ ਸਥਾਨ ਜਿੱਤਣ ਵਾਲੀਆਂ ਧੀਆਂ ਬੁਨਿਆਦੀ ਸਹੂਲਤਾਂ ਤੋਂ ਵਾਂਝੀਆਂ, ਸਰਕਾਰੀ ਦਾਅਵੇ ਫੋਕੇ

ਵਿਸ਼ੇਸ਼ ਰਿਪੋਰਟ : ਖੇਡਾਂ ਵਤਨ ਪੰਜਾਬ ਦੀਆਂ ‘ਚ ਪਹਿਲਾ ਸਥਾਨ ਜਿੱਤਣ ਵਾਲੀਆਂ ਧੀਆਂ ਬੁਨਿਆਦੀ ਸਹੂਲਤਾਂ ਤੋਂ ਵਾਂਝੀਆਂ, ਸਰਕਾਰੀ ਦਾਅਵੇ ਫੋਕੇ
ਸੰਜੀਵ ਜਿੰਦਲ
ਮਾਨਸਾ, 21 ਅਕਤੂਬਰ : ਖੇਡਾਂ ਵਤਨ ਪੰਜਾਬ ਦੀਆਂ – ਪੰਜਾਬ ਸਰਕਾਰ ਦਾ ਸਭ ਤੋਂ ਵੱਡਾ ਖੇਡ ਮੇਲਾ ਹੈ । ਇਸੇ ਮੇਲੇ ਵਿੱਚ ਹੈਂਡਬਾਲ ਵਿੱਚ ਪਹਿਲਾ ਸਥਾਨ ਹਾਸਲ ਕਰਕੇ ਪਿੰਡ ਫੱਤਾ ਮਾਲੋਕਾ, ਜ਼ਿਲ੍ਹਾ ਮਾਨਸਾ ਦੀਆਂ ਹੋਣਹਾਰ ਕੁੜੀਆਂ ਨੇ ਨਾ ਸਿਰਫ ਆਪਣੇ ਪਿੰਡ ਦਾ, ਸਗੋਂ ਪੂਰੇ ਜ਼ਿਲ੍ਹਾ ਮਾਨਸਾ ਅਤੇ ਪੰਜਾਬ ਦਾ ਨਾਮ ਰੌਸ਼ਨ ਕੀਤਾ ਹੈ।ਪਰ ਇਸ ਮਾਣਮੱਤੀ ਪ੍ਰਾਪਤੀ ਪਿੱਛੇ ਦੀ ਸੱਚਾਈ ਜਾਣੀ ਤਾਂ ਬੜਾ ਅਫਸੋਸ਼ ਹੋਇਆ।
ਜਿਨ੍ਹਾਂ ਹੱਥਾਂ ਨੇ ਪੰਜਾਬ ਲਈ ਸੋਨ ਤਮਗਾ ਜਿੱਤਿਆ, ਅੱਜ ਉਹੀ ਹੱਥ ਰੋਜ਼ਾਨਾ ਘਰ ਦਾ ਗੰਦਾ ਪਾਣੀ ਬਾਲਟੀਆਂ ਵਿੱਚ ਭਰ ਕੇ ਦੂਰ ਸੁੱਟਣ ਲਈ ਮਜਬੂਰ ਹਨ।
ਮੈਡਲ ਤਾਂ ਜਿੱਤ ਲਿਆ, ਸਹੂਲਤ ਕਦੋਂ ਮਿਲੇਗੀ?
ਜਦੋਂ ਪਿੰਡ ਵਾਸੀਆਂ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਖਿਡਾਰਨਾਂ ਦੇ ਪਰਿਵਾਰ ਬਹੁਤ ਹੀ ਗਰੀਬ ਅਤੇ ਮਿਹਨਤ-ਮਜ਼ਦੂਰੀ ਕਰਕੇ ਗੁਜ਼ਾਰਾ ਕਰਨ ਵਾਲੇ ਹਨ। ਸਰਕਾਰ ਵੱਲੋਂ ਖੇਡਾਂ ਨੂੰ ਪ੍ਰਫੁੱਲਿਤ ਕਰਨ ਲਈ ਵੱਡੇ-ਵੱਡੇ ਦਾਅਵੇ ਕੀਤੇ ਜਾਂਦੇ ਹਨ, ਪਰ ਜ਼ਮੀਨੀ ਹਕੀਕਤ ਕੁਝ ਹੋਰ ਹੀ ਹੈ।
1. ਖੇਡ ਸਹੂਲਤਾਂ ਦੀ ਘਾਟ : ਪਿੰਡ ਵਿੱਚ ਕੁੜੀਆਂ ਲਈ ਕੋਈ ਪੱਕਾ ਹੈਂਡਬਾਲ ਗਰਾਊਂਡ ਨਹੀਂ, ਕੋਈ ਕੋਚ ਨਹੀਂ, ਅਤੇ ਨਾ ਹੀ ਖੇਡ ਕਿੱਟਾਂ ਲਈ ਕੋਈ ਸਹਾਇਤਾ।
2. ਬੁਨਿਆਦੀ ਸਹੂਲਤਾਂ ਤੋਂ ਵਾਂਝੇ ਘਰ: ਸਭ ਤੋਂ ਵੱਡੀ ਸਮੱਸਿਆ ਘਰਾਂ ਵਿੱਚ ਗੰਦੇ ਪਾਣੀ ਦੀ ਨਿਕਾਸੀ ਦੀ ਹੈ। ਨਾਲੀਆਂ ਅਤੇ ਸੀਵਰੇਜ ਦਾ ਕੋਈ ਢੁੱਕਵਾਂ ਪ੍ਰਬੰਧ ਨਾ ਹੋਣ ਕਾਰਨ ਗੰਦਾ ਪਾਣੀ ਘਰਾਂ ਵਿੱਚ ਹੀ ਖੜ੍ਹਾ ਰਹਿੰਦਾ ਹੈ। ਪਰਿਵਾਰਾਂ ਨੂੰ, ਖਾਸ ਕਰਕੇ ਇਨ੍ਹਾਂ ਖਿਡਾਰਨਾਂ ਨੂੰ, ਸਵੇਰੇ-ਸ਼ਾਮ ਬਾਲਟੀਆਂ ਨਾਲ ਪਾਣੀ ਚੁੱਕ ਕੇ ਦੂਰ ਸੁੱਟਣਾ ਪੈਂਦਾ
ਹੈ।

3. ਆਰਥਿਕ ਤੰਗੀ: ਪ੍ਰਾਪਤੀ ਦੇ ਬਾਵਜੂਦ ਇਨ੍ਹਾਂ ਪਰਿਵਾਰਾਂ ਨੂੰ ਅਜੇ ਤੱਕ ਕਿਸੇ ਵੀ ਸਰਕਾਰੀ ਇਨਾਮ ਜਾਂ ਵਜ਼ੀਫੇ ਦਾ ਲਾਭ ਨਹੀਂ ਮਿਲਿਆ।
ਇੱਕ ਪਿੰਡ ਵਾਸੀ ਨੇ ਕਿਹਾ, “ਸਾਡੀਆਂ ਧੀਆਂ ਨੇ ਸਾਬਿਤ ਕਰ ਦਿੱਤਾ ਕਿ ਜੇ ਮੌਕਾ ਮਿਲੇ ਤਾਂ ਉਹ ਕਿਸੇ ਤੋਂ ਘੱਟ ਨਹੀਂ। ਪਰ ਸਰਕਾਰ ਨੂੰ ਵੀ ਸੋਚਣਾ ਚਾਹੀਦਾ ਹੈ ਕਿ ਜਿਹੜੀਆਂ ਕੁੜੀਆਂ ਪੰਜਾਬ ਦਾ ਨਾਮ ਉੱਚਾ ਕਰ ਰਹੀਆਂ ਨੇ, ਕੀ ਉਨ੍ਹਾਂ ਨੂੰ ਘੱਟੋ-ਘੱਟ ਰਹਿਣ ਲਈ ਸਾਫ਼-ਸੁਥਰਾ ਮਾਹੌਲ ਵੀ ਨਹੀਂ ਦੇ ਸਕਦੇ?”
ਪਿੰਡ ਵਾਸੀਆਂ ਅਤੇ ਖਿਡਾਰਨਾਂ ਦੇ ਪਰਿਵਾਰਾਂ ਨੇ ਪੰਜਾਬ ਸਰਕਾਰ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਮਾਨਸਾ ਤੋਂ ਜ਼ੋਰਦਾਰ ਮੰਗ ਕੀਤੀ ਹੈ ਕਿ:
1. ਇਨ੍ਹਾਂ ਜੇਤੂ ਖਿਡਾਰਨਾਂ ਨੂੰ ਖੇਡਾਂ ਵਤਨ ਪੰਜਾਬ ਦੀਆਂ ਤਹਿਤ ਬਣਦਾ ਸਨਮਾਨ, ਨਕਦ ਇਨਾਮ ਅਤੇ ਅਗਲੇਰੀ ਕੋਚਿੰਗ ਦੀ ਸਹੂਲਤ ਦਿੱਤੀ ਜਾਵੇ।
2. ਤੁਰੰਤ ਪਿੰਡ ਵਿੱਚ ਗੰਦੇ ਪਾਣੀ ਦੀ ਨਿਕਾਸੀ ਲਈ ਨਾਲੀਆਂ ਅਤੇ ਸੀਵਰੇਜ ਦਾ ਪੱਕਾ ਪ੍ਰਬੰਧ ਕੀਤਾ ਜਾਵੇ।
3. ਇਨ੍ਹਾਂ ਗਰੀਬ ਪਰਿਵਾਰਾਂ ਨੂੰ ਯੋਗਤਾ ਅਨੁਸਾਰ ਬੀ.ਪੀ.ਐਲ, ਮਨਰੇਗਾ, ਅਤੇ ਹੋਰ ਭਲਾਈ ਸਕੀਮਾਂ ਦਾ ਲਾਭ ਦਿੱਤਾ ਜਾਵੇ।
ਸੋਨ ਤਮਗਾ ਜਿੱਤਣ ਵਾਲੀਆਂ ਇਨ੍ਹਾਂ ਧੀਆਂ ਦੀ ਕਹਾਣੀ ਸਿਰਫ ਇੱਕ ਖ਼ਬਰ ਨਹੀਂ, ਸਗੋਂ ਸਿਸਟਮ ‘ਤੇ ਇੱਕ ਸਵਾਲ ਹੈ – ਕੀ ਅਸੀਂ ਆਪਣੇ ਚੈਂਪੀਅਨਾਂ ਨੂੰ ਸਿਰਫ ਤਾੜੀਆਂ ਤੱਕ ਹੀ ਸੀਮਤ ਰੱਖਾਂਗੇ ਜਾਂ ਉਨ੍ਹਾਂ ਨੂੰ ਜਿਉਣ ਲਈ ਬੁਨਿਆਦੀ ਸਹੂਲਤਾਂ ਵੀ ਦੇਵਾਂਗੇ?




